Kino Lumbardhi vazhdon të sjellë përvoja unike kinematografike për publikun prizrenas, duke hapur programin për muajin shkurt të klubit të filmit të Kinemasë së Zgjeruar me temën intriguese “Të humbur në ëndrra e makthe”.
Ky cikël filmash do të eksplorojë kufirin e hollë mes ëndrrës dhe makthit, duke ftuar audiencën në një udhëtim kinematografik të paharrueshëm, për të nderuar kujtimin për një regjisor të shquar amerikan.
Programi i këtyre filmave sipas njoftimit nis më 5 shkurt, në orën 20:00, me një film kult që transporton audiencën në një qytet të vogël ku qetësia është vetëm një iluzion, raporton Telegrafi.
Një ngjarje e pazakontë, gjetja e një veshi të lënduar në një fushë, e çon protagonistin në një investigim misterioz. Ai njihet me një këngëtare enigmatike të një klubi nate dhe zbret në një botë të errët kriminale, ku zbulon rrëmbimin e fëmijës së saj dhe një zinxhir ngjarjesh të mbushura me tension dhe pasiguri.
Ky program synon të sjellë përzgjedhje filmash që testojnë perceptimin mbi realitetin, duke sfiduar shikuesit të zhyten në rrëfime komplekse. Audienca e rekomanduar për këtë program është 16+, për shkak të përmbajtjes së fortë dhe temave të ndjeshme. Pos me 5 shkurt, filmat do të shfaqen edhe me 12, 19 dhe 26 shkurt në ekranin e hollit të brendshëm të Kino Lumbardhit.
Për të gjithë dashamirët e kinemasë artistike, sipas Lumbardhit, kjo është një mundësi për të përjetuar filma që sfidojnë konvencionet dhe provokojnë mendimin. /Telegrafi/