Kina raportoi të enjten një numër rekord të infeksioneve të përditshme me Covid-19, pasi një rritje mbarëkombëtare e rasteve krijon presion mbi qasjen gjithnjë e më të papëlqyeshme të vendit me tolerancë zero ndaj virusit.
Sipas mediave të huaja, përcjell Telegrafi, Komisioni Kombëtar i Shëndetit (NHC) regjistroi 31,444 raste të transmetuara në nivel lokal të mërkurën – duke tejkaluar kulmin e mëparshëm prej 29,317 rasteve të regjistruara më 13 prill gjatë bllokimit disamujor të Shangait.
Rritja po “ushqehet” nga shpërthimet në qytete të shumta dhe vjen pavarësisht një refuzimi nga autoritetet për t’i dhënë fund kontrolleve të rrepta të infeksionit edhe përballë një reagimi në rritje – dhe të paprecedentë – kundër qasjes së tyre të ashpër të bllokimeve të vazhdueshme, karantinave dhe mandateve të testimit masiv.
Ndërkohë, një vazhdim i vdekjeve të lidhura me Covid-19 ka shtuar presion të mëtejshëm.
Pekini regjistroi të mërkurën vdekjen e tij të katërt të lidhur me Covid-19 që nga fundjava e kaluar, së bashku me 1,648 infeksione lokale – dita e tretë radhazi me më shumë se 1,000 raste lokale.
Të enjten, zyrtarët e qytetit thanë se po shndërronin një qendër të madhe ekspozite në një spital të improvizuar për karantinimin dhe trajtimin e pacientëve me Covid-19.
Kjo ishte vetëm shenja e fundit e rritjes së kontrolleve rreth Covid-19 nga kryeqyteti.
Në fillim të kësaj jave, shkollat në disa rrethe i zhvendosën mësimet në internet ndërsa Chaoyang – epiqendra e shpërthimit të qytetit dhe shtëpia e shumë bizneseve dhe ambasadave ndërkombëtare – u bëri thirrje banorëve të qëndrojnë në shtëpi dhe mbyllën restorantet, palestrat dhe sallonet e bukurisë.
Kina, ekonomia e fundit e madhe në botë që ende zbaton masa të rrepta “zero-Covid”, njoftoi një lehtësim të kufizuar të politikës në fillim të këtij muaji në atë që disa vëzhgues e panë si një shenjë të qeverisë që pranoi mangësitë e saj. /Telegrafi/