Kompania Kosovare për Distribuim të Energjisë Elektrike në Kosovë-KEDS po investon mbi 1 milion euro në rrjetin elektrik të Komunës së Vushtrrisë. Në qendrën e këtij qyteti, rrjeti po vendoset nëntokë derisa në fshatrat përreth pritet që rrjeti i vjetër të zëvendësohet komplet me rrjet të ri.
Investimi i KEDS-it në qendër të qytetit të Vushtrrisë përfshin 7 kilometra rrjet nëntokësor dhe planifikohet që të përfundojë deri në fund të muajit maj.
Zyrtari për Komunikim në KEDS, Adlum Ramadani, tha se përveç që do të largohen kabllot nga qendra e qytetit të Vushtrrisë, me këtë investim do të krijohet edhe infrastrukturë e re energjetike.
“KEDS është duke investuar rreth 1 milionë euro në infrastrukturën energjetike, pra po krijohet një infrastrukturë komplet e re energjetike për qytetin e Vushtrrisë. Këtu në qendër të qytetit të gjitha këto kabllot të cilat shihen do të largohen në një kohë shumë të shpejtë dhe gjithashtu do të krijohet një infrastrukturë e re energjetike nëntokësore ku përmes këtij investimi do të vendosen stabilimentet e reja dhe do të krijohen lidhjet unazore të cilat do të mundësojnë furnizim alternativ në rast të ndonjë avarie në rrjet, që nënkupton që konsumatorët tanë nuk do të afektohen edhe nëse ndodh ndonjë avari për arsye se furnizimi automatikisht do të bartet në linjën tjetër”, tha ai për KosovaPress.
Këto investime janë pjesë e projektit që KEDS po implementon atje e që përfshin renovimin e rrjetit elektrik për tërë Komunën e Vushtrrisë.
Sipas Ramadanit, nga këto investime do të përfitojnë edhe fshatrat Sllatinë, Dobërllukë, Banjskë, Smrekonicë, Tërllobuq dhe Pasomë, ku rrjeti i tensionit të ulët dhe të mesëm tërësisht do të rikonstruohet.
“Investimi që po bëhet në qendrën e qytetit, pra në sheshin “Adem Jashari” ku të gjitha kabllot do të vendosen nëntokë është bashkëfinancim dhe bashkëpunim me Komunën e Vushtrrisë. Ndërkaq, krahas këtij investimi KEDS është duke investuar fuqishëm edhe në fshatrat përreth kësaj komune, pra në fshatra të cilat do të përfitojnë nga këto investime rrjeti i tensionit të ulët dhe të mesëm do të rikonstruohet, do të vendoset rrjet tërësisht i ri me të gjitha elementet përcjellëse elektrike ku do të mundësojë furnizim kualitativ dhe të qëndrueshëm për konsumatorët tanë”, tha ai.
KEDS edhe në të kaluarën ka investuar në rrjetin elektrik të Vushtrrisë. Investimet kanë përfshirë rritjen e kapaciteteve energjetike, vendosjen e trafove të reja, zëvendësimin e shtyllave dhe stabilimenteve.
Përveç Komunës së Vushtrrisë, KEDS investime në rrjetin nëntokësor po realizon edhe në disa komuna të tjera, e që synohet që në një kohë të shkurtër i gjithë rrjeti në qendra të qyteteve të pozicionohet nëntokë.
“Kjo nuk është hera e parë që KEDS po bënë investime në Komunën e Vushtrrisë, pasi që edhe në të kaluarën KEDS ka bërë investime të vazhdueshme në infrastrukturën energjetike, ku ka bërë zëvendësime të stabilimenteve, zëvendësim të shtyllave, vendosje të linjave të reja, të cilat sigurisht kanë ndikuar edhe në shërbimet tona në raport me konsumatorët. Gjithashtu, investime në rrjet nëntokësor njëkohësisht po zhvillohen edhe në komunat e tjera të Kosovës, për shembull kemi rastin e Komunës së Prishtinës që është duke u zhvilluar një mega projekt investiv në rrjet nëntokësor, pastaj kemi në komunën e Fushë Kosovës, kemi Komunën e Prizrenit. Brenda një të ardhme shumë të afërt KEDS synon që i gjithë rrjeti ajror në qendra të qytetit të pozicionohet nëntokë në mënyrë që të rritet siguria për komunitetin”, tha ai.
Këto investime janë jetësim i përkushtimit të KEDS-it që të jetë sa më afër qytetarëve të Kosovës dhe të përmirësojë në vazhdimësi shërbimet për ta.