Botuesi i lojërave Activision ka shpallur Kampionatin Botëror 2022 për telefona celular në video-lojën Call of Duty.
Kampionati i cili pritet të fillojë me datën 31 mars, do të zhvillohet me katër faza online, ku kanë të drejtë pjesëmarrjeje lojtarët nga e mbarë bota, në garën për t’u kualifikuar për në finalet globale.
Kampionati Botëror i 2022 Call of Duty Mobile do të zhvillohet në vende të ndryshme të botës, faza e parë fillon me katër kualifikime në internet çdo fundjavë nga 31 mars deri më 24 prill.
Lojtarët garues në fazën e parë që kryejnë 10 ndeshje të renditura me shumë lojtarë dhe fitojnë 60 pikë, do të kualifikohen për fazën e dytë, ku do të ketë shpërblime të reja për çdo javë.
‘Play-off’-et Rajonale do të luhen gjatë gjithë gushtit në Amerikën Latine, Amerikën e Veriut, Evropë, Indi dhe Japoni.
Numri i shpërblimeve në këtë kampionat, sipas faqes zyrtare të Call of Duty, do të jetë më i madhi në histori të CoD Mobile, ku arrin vlerën rreth dy milionë euro.
Finalet e Botërorit ‘Call of Duty Mobile’ do të zhvillohen në LAN në dhjetor, por që lokacioni ende nuk është zbuluar. /Telegrafi/
