Një grua iraniane nuk do të ballafaqohet me kurrfarë akuze, pasi shëtiti e zhveshur dhe vetëm me të brendshmet rrugëve të Teheranit, si shenjë proteste ndaj hixhabit që autoritetet iraniane kërkojnë që çdo grua ta bartë.
Në fillim të këtij muaji, një video u bë virale në rrjetet sociale, ku shfaqte një grua që sipas BBC-së bëhej fjalë për Ahoo Daryaei, që ishte zhveshur pranë kampusit të universitetit dhe me forcë u arrestua nga policia e ‘moralit’, transmeton Telegrafi.
Zëdhënësi i gjykatës iraniane ka njoftuar se ajo do të trajtohet në spital dhe më pas do t’i rikthehet familjes së saj.
E arrestimi i saj ishte dënuar gjerësisht nga faktori ndërkombëtar, ku Amnesty International kishte bërë thirrje për lirimin e menjëhershëm të saj pa kushte.
“Duke marrë parasysh se është dërguar në spital dhe u konstatua se është e sëmurë, ajo do t’i dorëzohet familjes së saj – dhe asnjë akuzë nuk do të ngritet ndaj saj”, tha zëdhënësi i gjykatës së Teheranit, Asghar Jahangir.
Organizata e lëvizjes studentore kishte publikuar videon e arrestimit të saj, ku u tha se Daryaei ishte ballafaquar me agjentë të këtij vendi që e arrestuan për mos mbulimin e kokës dhe zhveshje në hapësira publike. /Telegrafi/
