Polonia ka arritur fitore në ndeshjen e fundit në Grupin H, pasi kanë triumfuar me rezultat minimal 1-0 ndaj Japonisë.
Por Kombëtarja aziatike është kualifikuar tutje vetëm falë kartonëve të verdhë që ka më pak se Senegali.
Në minutën e 12-të japonezët patën rast të mirë shënimi me Shinji Okazaki por që goditja e tij nuk ishte e saktë.
Polakët u përgjigjën në pjesën e parë me sulmuesin Kamil Grosicki i cili për pak sa nuk arriti të shënonte.
Kësisoj 45 minutat e para të kësaj ndeshje përfunduan ashtu siç filluan 0-0, me japonezët që kishin më shumë nga loja.
Japonia edhe në pjesën e dytë e nisi më furishëm por pa arritur të rrezikonte seriozisht portën e polakëve.
Kur të gjithë po prisnin golin e Japonisë, ndodhi e kundërta në Volgograd Arena.
Mesfushori Rafal Kurzawa harkoi bukur nga goditja e dënimit ndërsa mbrojtësi Jan Bednarek nuk e pati të vështirë të shënonte për 0-1 në minutën e 60-të.
Deri në fund të ndeshjes, aziatikët provuan me çdo kusht shënimin e golit të barazimit por një gjëje të tillë nuk ia dolën duke përfunduar ndeshje me fitoren e polakëve 1-0.
Aziatikët e përfunduan fazën e grupeve me një fitore, një barazim dhe një humbje sa kishte edhe Senegali dhe me golë dallim të njëjtë 4:4.
Kësisoj ata kualifikohen në mesin e 16 Kombëtareve më të mira vetëm në sajë të kartonëve të verdhë ku kanë marrë pesë sosh ndërsa Senegali një më shumë.
Japonezët në 1/8 e finales do të përballen me njërën mes Kombëtares së Belgjikës ose Anglisë varësisht se cila përfundon e para. /Telegrafi/