Pas plot tre vitesh që nga rasti i parë i coronavirusit, autoritetet japoneze hoqën sot detyrimin për të mbajtur maska, por thuajse asgjë nuk ka ndryshuar në një vend që vlerësonte shumë efektivitetin e maskave në mbrojtjen kundër Covid-19.
Kështu, shumica e pasagjerëve që u larguan nga stacioni kryesor i trenit në Tokio në mëngjes, ditën e parë pas heqjes së kësaj mase, mbanin maska ndërsa shkonin në punë, e njëjtë ishte rasti me njerëzit që ecnin në rrugë, transmeton Telegrafi.
Gjatë një takimi të komisionit të buxhetit të parlamentit, disa ligjvënës kishin ende maska, edhe pse kryeministri Fumio Kishida nuk mbante maskë kur mbërriti në kabinetin e tij.
Shikuesit në një ndeshje bejsbolli që u mblodhën jashtë një stadiumi në Tokio disa orë përpara ndeshjeve Australi-Republika Çeke dhe Kinë-Kore e Jugut mbanin gjithashtu maska, megjithëse mund të brohorisnin dhe të shikonin ndeshjet pa maska.
Heqja e kërkesës për maska është një nga hapat më të fundit që qeveria japoneze po ndërmerr në lehtësimin e rregullave të coronavirusit, teksa përpiqet të nxisë aktivitetin e biznesit.
“Nga sot vendosja e maskave i është lënë gjykimit individual. Ne nuk detyrojmë askënd t’i mbajë dhe as t’i heqin ato. Mendoj se do të ketë më shumë raste kur do të heq maskën”, tha kryeministri Kishida.
Megjithatë, Kishida u kërkoi njerëzve që të mbanin maska rreth njerëzve të cenueshëm, për t’i mbrojtur ata nga rreziku i infeksionit. Restorantet, dyqanet ushqimore dhe linjat ajrore kanë hequr tabelat që u kërkojnë klientëve të mbajnë maska, por shumë nga punonjësit e tyre ende i mbajnë ato për të treguar konsideratë për klientët dhe të tjerët që kanë nevojë për mbrojtje. /Telegrafi/