Nuk ka rëndësi nëse je adhuruese e horoskopit apo thjesht ke kureshtje për astrologjinë – ka shumë mundësi që të paktën një herë të kesh pyetur: “A është Merkuri në prapavijë?”
Kjo dukuri ndodh tre deri katër herë në vit dhe shpesh konsiderohet si fajtore për prishje të papritura të lidhjeve, keqkuptime në punë, trafikun e tmerrshëm apo mesazhet që përfundojnë gabimisht te personi i paduhur.
Nëse do t’i paraprish këto situata, nuk është ide e keqe të mbash shënim se kur ndodh prapavija e Merkurit në 2025.
Çfarë është prapavija e Merkurit?
Prapavija e Merkurit është një periudhë që zgjat rreth tre javë, gjatë së cilës ky planet, që qeveris komunikimin, udhëtimet dhe teknologjinë, ngadalësohet dhe duket sikur lëviz mbrapsht nga këndvështrimi ynë në Tokë. Kur kjo ndodh, këto fusha të jetës mund të përballen me kaos – ndonjëherë pa ndonjë arsye të dukshme, ndonjëherë me një arsye të qartë.
Merkuri mund të jetë i njohur si “planeti dinak”, por në fakt ndikon në mënyrën si mendojmë dhe si shprehemi. Prapavijat e tij janë mundësi për të reflektuar, rishikuar planet dhe për të rimarrë energjitë e harxhuara.
Kur është prapavija e Merkurit në 2025?
Në vitin 2025, Merkuri do të hyjë në prapavijë tri herë: në mars, korrik dhe nëntor. Ja datat specifike që duhet të shënosh në kalendar:
• 15 mars – 7 prill në Dash dhe Peshq
• 18 korrik – 11 gusht në Luan
• 9 nëntor – 29 nëntor në Shigjetar dhe Akrep
Si ndikon kjo prapavijë?
Në vitin 2025, të gjitha prapavijat do të ndodhin kryesisht në shenjat e zjarrit (Dash, Luan, Shigjetar). Këto shenja janë energjike dhe të orientuara drejt veprimit, ndaj prapavija e Merkurit gjatë këtyre periudhave mund të jetë një mundësi për të rishikuar dhe reflektuar mbi mënyrat si mund të arrijmë qëllimet tona më ambicioze.
Sidomos për shenjat e zjarrit, kjo periudhë do të jetë e vlefshme për të përmirësuar vetëbesimin, marrëdhëniet dhe mënyrën si e shprehin veten. Nëse je Dash, Luan apo Shigjetar (ose ke këto shenja në pozicione të rëndësishme në hartën tënde astrologjike), do të përfitosh nga meditime të thella dhe rivlerësim i qëllimeve.
Si ndikon te secila shenjë?
Nëse dëshiron të kuptosh më mirë si do të ndikohet jeta jote nga prapavijat e Merkurit, është e rëndësishme të shohësh hartën tënde astrologjike dhe të vëzhgosh në cilën shtëpi (fushë e jetës) ndodhen Dash, Luan dhe Shigjetar.
Për shembull, nëse Shigjetari ndodhet në shtëpinë e shtatë të marrëdhënieve (që ndodhet përballë shenjës tënde në hartë), prapavija e Merkurit në nëntor do të të bëjë të reflektosh dhe të rishikosh marrëdhëniet romantike, miqësitë ose bashkëpunimet profesionale.
Çfarë duhet të bësh gjatë prapavijës së Merkurit?
Nëse të ka ndodhur të përballesh me keqkuptime, vonesa apo defekte teknologjike gjatë këtyre periudhave, mos u shqetëso – kjo është mëse normale gjatë prapavijës së Merkurit.
Për të shmangur problemet, është e rëndësishme të:
• Rishikosh gjithçka para se ta dërgosh.
• Mos marrësh vendime të rëndësishme pa u menduar mirë.
• Rezervosh më shumë kohë për udhëtime dhe takime.
• Të mendosh dy herë para se t’i dërgosh mesazh ish-partnerit.
Prapavija e Merkurit nuk është domosdoshmërisht diçka e keqe. Përkundrazi, mund të jetë një mundësi e shkëlqyer për të bërë një pauzë, për të mbyllur çështje të lëna pezull dhe për të rishikuar projektet ekzistuese.
Kur Merkuri të kthehet në lëvizje të drejtpërdrejtë, do të jesh më e qartë dhe e sigurt për hapat e radhës! /Telegrafi/