Italia ka luajtur baras me rezultat 0-0 në miqësoren ndaj Turqisë e cila u zhvillua në qytetin e Bolognës.
Shenjat e para në këtë takim i dha Turqia që ishte pranë golit në minutën e 24-të me anë të Kaan Ayhan, por gjuajtja e tij me kokë përfundoi mbi portë.
Italia rastin më të mirë për gol e pati krejt në fund të pjesës së parë, kur goditja me kokë e Bryan Cristantes (48′) shkoi pranë shtyllës së djathtë.
Në pjesën e dytë Turqia rrezikoi sërish e para, kësaj radhe me anë të Merih Demiral (63′) të cilit ia mohoi goli një pritje e bukur nga Guglielmo Vicario.
Deri në fishkëllimën e fundit të gjyqtarit nuk pati më ndonjë rast për gol dhe ndeshja u mbyll pa fitues.
Ky ishte “testi” i parë i Turqisë para fillimit të Euro 2024, teksa do të luajë edhe një tjetër ndeshje miqësore me Bosnje dhe Hercegovinën para se të udhëtojë në Gjermani.
Kujtojmë që Shqipëria do të përballet me Italinë në ndeshjen hapëse të tyre në grupin B, ndeshje kjo që do të luhet më datë 15 qershor me fillim nga ora 21:00./Telegrafi/
All over at the Dall’Ara 🔚 #ITATUR #Azzurri #VivoAzzurro pic.twitter.com/11CY4YZZqY
— Italy ⭐️⭐️⭐️⭐️ (@Azzurri_En) June 4, 2024