Kryetari i FFK-së, Fadil Vokrri me bashkëpunëtorë, nënkryetarin e FFK-së, Agim Ademi dhe sekretarin e përgjithshëm Eroll Salihu, priti në zyrat e FFK-së ish-presidentin e Kroacisë, Stipe Mesiç.
Duke e falënderuar për këtë vizitë presidenti Vokrri e njohu Mesiç për zhvillimet pas pavarësimit të futbollit të Kosovës që nga viti 1991, si dhe rrugëtimin plotë sakrifica deri në pranimin e FFK-së në UEFA dhe FIFA.
Tutje Vokrri foli edhe për ligat e Kosovës, ekipet përfaqësuese si dhe për strukturën organizative të FFK-së. Gjatë takimit shumë të përzemërt presidenti Vokrri dhe ish-presidenti i Kroacisë, Mesiç evokuan kujtime nga e kaluara.
Pas takimit, para mediave Mesiç u shpreh se“Jam i lumtur që takova sot presidentin e FFK-së, Fadil Vokrri, i cili me njohu me të gjitha zhvillimet e futbollit të Kosovës. Ju keni luajtur nëpër fusha të improvizuara por vullneti i juaj ka bërë që ju sot keni edhe ekipe përfaqësuese dhe të gjitha të tjerat që i kanë edhe shtetet tjera. Me Vokrri jemi takuar edhe dikur në Beograd, unë në një funksion tjetër, ndërsa ai në një funksion tjetër. Por gjithmonë ishte kënaqësi”.
Ndërkaq, kryetari Vokrri tha“Falënderoj Mesiç për këtë vizitë. Federata e Futbollit e Kroacisë na ka ndihmuar shumë në pranimin tonë në institucionet ndërkombëtare. Sikur që edhe shteti i Kroacisë e ka ndihmuar shumë Kosovën. FFK-ja dhe federata kroate e futbollit kanë marrëdhënie të mira dhe këto vazhdojnë të kultivohen dhe të thellohen gjithnjë e më shumë”.