Garda Revolucionare e Iranit (IRGC) ka njoftuar se mbrëmë ka kryer sulme në veri te Irakut dhe Siri – duke goditur me raketa balistike.
Sulmi ishte në hakmarrje për sulmet e fundit terroriste në Iran, njoftoi portali i IRGC-së, transmeton Telegrafi.
Garda njoftoi se milicia terroriste e Shtetit Islamik ishte “e vendosur në territoret e okupuara të Sirisë dhe u shkatërrua nga gjuajtja e një sërë raketash balistike”.
Pothuajse njëkohësisht, pak para mesnatës, disa shpërthime të forta tronditën qytetin verior të Irakut, Irbil.
Dëshmitarët thanë se disa raketa ranë pranë konsullatës amerikane në ndërtim e sipër.
Aeroporti ndërkombëtar në atë qytet kurd u godit gjithashtu. IRGC njoftoi se sulmet shkaktuan “shkatërrimin e selisë së spiunazhit të regjimit sionist (Mossad)”.
Drejtori i aeroportit ndërkombëtar të Irbilit tha në një deklaratë se fluturimet që vijnë dhe nisen nga aeroporti po zhvillohen normalisht.
Burime të sigurisë në Irbil thanë për DPA se “raketat iraniane ranë në fermat në veri të Irbilit dhe goditën shtëpitë dhe pronat e qytetarëve”.
Zëdhënësi i Departamentit të Shtetit të SHBA, Mattheë Miller, tha në platformën X se SHBA “dënon fuqishëm sulmet iraniane në Irbil dhe shpreh ngushëllimet e saj për familjet e viktimave”.
“Ne i kundërshtojmë sulmet raketore të Iranit dhe mbështesim qeverinë e Irakut dhe përpjekjet e qeverisë rajonale të Kurdistanit për të përmbushur aspiratat e popullit irakian”, shtoi ai.
Situata në rajon ka qenë jashtëzakonisht e tensionuar që nga shpërthimi i luftës në Gaza më shumë se tre muaj më parë.
Nuk ka pasur asnjë sulm me raketa të IRGC-së deri më tani, por grupet militante aleate me Iranin kanë sulmuar shpesh objektiva në Siri dhe Irak gjatë muajve të fundit.
Izraeli dhe SHBA janë konsideruar si armiqtë më të mëdhenj të Iranit që nga Revolucioni Islamik në 1979. /Telegrafi/
The explosions are really big in Irbil Iraq. pic.twitter.com/oiQex37VT7
— Aqssss (@AqssssFajr) January 15, 2024