Dhjetë të bardhë të vezës, 0.5 litra ujë, dhe një grusht arra: Kështu e fillon ditën bodibuilderja më e vjetër në botë, 80 vjeçarja Ernestine Shepherd.
Vit pas viti ajo vazhdon të jetojë sipas motos së saj: Mosha nuk është asgjë përveçse një numër, transmeton Telegrafi.
Shepherd nuk i ka kaluar të gjitha ditët e saj duke ngritur pesha dhe duke bërë gara. Në fakt, ajo kishte qenë 56-vjeçare kur e kishte ndryshuar stilin e jetesës dhe kishte vendosur ta ketë një trup me formë të mirë.
Por as këtë rrugëtim nuk e ka bërë e vetme: Një ditë pasi kishte dalë të bëjë ‘shopping’ për rroba noti, ajo dhe motra e saj kishin bërë një pakt që të shkonin në palestër së bashku. Por menjëherë pas këtij pakti, motra e saj kishte vdekur si pasojë e një problemi të trurit.
Shepherd e kishte përballuar vështirë vdekjen e saj dhe kishte përfunduar e sëmurë me shtypje të lartë të gjakut, depresion, sulme paniku, etj.
Ajo kishte mbajtur zi për muaj të tërë, por me kohën, asaj i ishte rikujtuar fakti se motra e saj do të kishte dashur që kjo ta vazhdonte rrugëtimin e saj të fitnesit. Në moshën 71 vjeçare, Shepherd kishte filluar të stërvitej për garën e saj të parë të bodibuildingut – dhe ishte renditur e para, pavarësisht se garonte kundër femrave shumë më të reja se ajo.
Tani ajo zgjohet në orën 4:00 të mëngjesit për të vrapuar afro 15 kilometra. Bën ushtrime të forcës katër ditë në javë, ka vetëm 10% dhjam në trup, ndërsa i motivon femrat (edhe meshkujt!) tjerë që ta arrijnë potencialin maksimal fizik duke punuar si trajnere personale. /Telegrafi/
