Kryetari i Komunës së Pejës, z. Gazmend Muhaxheri, ka shënuar hapjen zyrtare të shtëpisë së fshatit në Jabllanicë të Vogël, një objekt i dedikuar për përmirësimin e kushteve të jetesës dhe zhvillimin e aktiviteteve sociale, edukative dhe kulturore për banorët e këtij fshati.
Sipas postimit në Facebook nga Komuna e Pejës, shtëpia e fshatit është e dizajnuar për të ofruar një hapësirë për aktivitete të ndryshme, duke u shndërruar kështu në një pikë takimi dhe bashkëpunimi për të gjithë komunitetin.
“Ky projekt shënon një hap vendimtar drejt përmbushjes së misionit për arritje të mirëqenies dhe zhvillimit ne komunitet”, kanë shkruar ndër të tjera ata, transmeton Telegrafi
Në ceremoninë e hapjes ishin të pranishëm edhe Drejtoresha për Mirëqenie Sociale, Albulena Mujaj Bajraktari, dhe një numër i madh banorësh, të cilët ishin dëshmitarë të këtij momenti të rëndësishëm për komunitetin e Jabllanicës së Vogël.
Shtëpia e Fshatit do të ofrojë mundësi për aktivitete të ndryshme dhe do të jetë një vend ku banorët mund të mblidhen dhe të bashkëpunojnë për të mirën e përbashkët. /Telegrafi/
