Kryetari i Komunës së Gjilanit, Alban Hyseni, ka thënë se për herë të parë pas luftës, fermerët e komunës subvencionohen me 8 cent për litër të qumështit.
Në kuadër të “Javës së Bujqësisë”, kryetari i Komunës së Gjilanit Alban Hyseni, bashkë me drejtorin për Bujqësi, Bajram Isufin, kanë vizituar fermerin Besnik Muji nga fshati Bresalc, njërin ndër përfituesit e projekteve të ndara nga komuna, përkatësisht nga Drejtoria e Bujqësisë.
I pari i Gjilanit, theksoi se fermeri të cilin e vizituan, ka treguar për përkushtimin dhe punën e jashtëzakonshme që po bën në fermën e tij.
“Për herë të parë pas luftës, Besniku dhe fermerët e tjerë të Gjilanit po përfitojnë nga politikat tona mbështetëse, duke u subvencionuar me 8 cent për litër të qumështit. Me aprovimin e buxhetit kjo do të rritet në 10 cent për litër”, tha Alban Hyseni.
Kryetari i Komunës së Gjilanit, më tej tregon se bujqësia është një ndër profesionet më jetike për shoqërinë. /Telegrafi/