Site icon Telegrafi

Hyseni: Nga 390 mijë euro sa ishte buxheti për bujqësi, ne e kemi rritur prej 1.5 milionë euro

Kryetari i Komunës së Gjilanit, Alban Hyseni, theksoi se për vitin 2023, komuna ka ndarë një buxhet të përgjithshëm prej 1.5 milionë euro për sektorin e bujqësisë, duke bërë një rritje të konsiderueshme krahasuar me buxhetin e vitit 2022 prej 390 mijë euro, të miratuar nga qeverisja e kaluar.

Prej këtij buxheti të përgjithshëm, 800 mijë euro janë nga fondet e komunës, ndërsa 700 mijë euro janë siguruar përmes marrëveshjeve të bashkëfinancimit.

“Ky është një hap i madh përpara për bujqësinë në komunën tonë. Përveç rritjes së buxhetit, kemi arritur të përmirësojmë ndjeshëm transparencën në ndarjen e subvencioneve,” tha Hyseni.

Ai shtoi se fermerët tani kanë mundësinë të përfaqësohen drejtpërdrejt në Kuvendin Komunal gjatë procesit të ndarjes së subvencioneve, ndërsa listat e përfituesve publikohen rregullisht në uebfaqen e komunës, duke garantuar transparencë të plotë.

Sipas Hysenit, një tjetër arritje është krijimi i një zyre të veçantë për bujqit dhe fermerët brenda komunës, e cila ofron shërbime të shpejta dhe është gjithmonë në dispozicion për t’iu përgjigjur pyetjeve dhe nevojave të tyre.

“Bujqësia mbetet prioriteti ynë kryesor, dhe nuk do të ndalemi së mbështeturi fermerët tanë,” deklaroi Hyseni. /Telegrafi/

Exit mobile version