Komuna e Gjilanit njofton se me krijimin e një modeli të ri financiar, ka arritur të paguaj rreth 10 milionë euro borxhe të vjetra nga 14 milionë sa ka lënë qeverisja e kaluar.
Përmes një komunikate për media, kryetari Hyseni thotë se borxhi i qeverisë së mëparshme arriti në 14 milionë, ndërkohë që sipas tij, ndau vetëm 5 milionë euro për t’i shlyer ato.
“Keq menaxhimi dhe mungesa e planifikimit bënë që ndër vite të paguhen miliona euro nga taksat e qytetarëve për shpenzime përmbarimore. Për shumë nga këto toka të shpronësuara, nuk kishte fare projekte”, tha Hyseni.
Ai theksoi se ndryshe nga kjo, qeverisja aktuale nën drejtimin e tij ka krijuar një model të ri të menaxhimit të taksave dhe parasë publike.
“Me një qasje të përgjegjshme financiare, kemi arritur të kufizojmë borxhet e reja në vetëm 700 mijë euro, ndërsa kemi shlyer rreth 10 milionë euro borxhe të vjetra”, tha Hyseni.
Kryetari i Komunës së Gjilanit, tha se ky model i ri synon të forcojë transparencën dhe llogaridhënien në përdorimin e fondeve publike, duke garantuar sipas tij, që taksat e qytetarëve të shpenzohen me kujdes dhe përgjegjësi. /Telegrafi/