Faqja më e madhe për CS:GO, HLTV, ka njoftuar se këtë vit shfaqja e çmimeve do të zhvillohet në janar me audiencë të drejtpërdrejtë dhe kategori të reja.
HLTV Award Show 2022 do të zhvillohet të shtunën, më 14 janar në Stokholm, dhe do të transmetohet drejtpërdrejtë në kanalin zyrtar të HLTV në platformën Twitch.
Gjatë kësaj ceremonie do të zgjidhet lojtari më i mirë për vitin 2022, si dhe skuadra dhe momenti më i mirë i vitit të përzgjedhur nga HLTV.
Gjithashtu HLTV ka njoftuar se këtë vit do të zgjedhin edhe lojtaren dhe ekipin më të mirë të femrave.
HLTV Award Show 2022 do të jetë një ngjarje vetëm me ftesa, ku do të ketë një audiencë të zgjedhur prej 300 anëtarësh të njohur të industrisë, ku bëjnë pjesë lojtarë aktivë dhe veteran të CS:GO.
Disa prej tyre tashmë janë zbuluar nga HLTV: Kenny ‘kennyS’ Schrub, Olof ‘olofmeister’ Kajbjer, Filip ‘NEO’ Kubski dhe Patrik ‘f0rest’ Lindberg.
Shfaqja e Çmimeve do të zhvillohet në Space Arena, një vend i ri i teknologjisë së lartë në qendër të Stokholmit që synon të bëhet arena kombëtare e eSports të Suedisë. /Telegrafi/