Kompania Rajonale e Ujësjellësit “Hidroregjioni Jugor” i ka bërë thirrje konsumatorëve që ti paguajnë faturat për shërbimet e ujësjellësit dhe kanalizimit me kohë.
Sipas kësaj kompanie, vetëm me pagesa të rregullta, mund të shmanget procedimi i lëndëve në përmbarim apo edhe shkyçjet, ndërkohë që arkëtimi i duhur i mjeteve financiare mundëson financimin e investimeve për përmirësimin e mëtejmë të shërbimeve, raporton Telegrafi.
“Ne ju ftojmë të paguani faturat e ujit me kohë! Kjo është një përgjegjësi e përbashkët qytetare dhe ndihmon në ruajtjen e burimeve të ujit dhe sigurimin e furnizimit të qëndrueshëm të ujit. Po ashtu, me pagesat e këtyre faturave ndihmoni për një mjedis më të qëndrueshëm dhe furnizim më të sigurt të ujit, si dhe në financimin e investimeve të nevojshme për të ruajtur dhe përmirësuar këto shërbime”, thuhet në njoftimin e KRU “Hidroregjioni Jugor”.
Në të njëjtën kohë, kompania ka bërë të ditur se pagesat e faturave mund të kryhen në të gjitha njësitë operative, përmes llogarive bankare apo edhe përmes aplikacionit E-HRJ. /Telegrafi/