Një gjykatës amerikan ka hedhur poshtë një çështje kundër princit të kurorës saudite, Mohammed bin Salman për orkestrimin e vrasjes së gazetarit, Jamal Khashoggi, duke thënë se ai kishte të drejtën e imunitetit pavarësisht “pretendimeve të besueshme” se ishte i përfshirë në vrasje.
Gjykatësi amerikan John Bates, i cili ka një histori të gjatë të kryesimit të rasteve të sigurisë kombëtare, pranoi “shqetësimin” në marrjen e vendimit, por tha se duart e tij ishin të lidhura në mënyrë efektive nga rekomandimi i fundit i administratës së presidentit amerikan, Joe Biden se Princi Mohammed ka imunitet.
Vendimi për t’i hequr akuzat, të cilat i kishin ngritur e fejuara e Khashoggit, Hatice Cengiz dhe grupi pro-demokracisë i themeluar nga gazetari i vrarë i “Democracy for the Arab World Now”, Dawn, ka të ngjarë të shënojë fundin e përpjekjeve për të mbajtur përgjegjës mbretin e ardhshëm saudit për vrasjen e vitit 2018, raporton theguardian.
Padia akuzonte liderin saudit dhe zyrtarët për “rrëmbim, lidhje, drogim, torturim dhe vrasje të gazetarit amerikan dhe avokatit të demokracisë Jamal Khashoggi”.
Khashoggi, një gazetar dhe kritik i shquar i regjimit në Arabinë Saudite, u vra në konsullatën saudite në Stamboll në tetor të vitit 2018.
Princi Mohammed u emërua Princi i Kurorës në vitin 2017 nga babai i tij, Mbreti Salman bin Abdulaziz Al Saud, dhe 37-vjeçari më pas u emërua Kryeministër në shtator të këtij viti.
Mohammed bin Salman mohon ndonjë rol në vrasjen e Khashoggit. /Telegrafi/