Zyrtari i Hezbollahut, Mohammad Raad, ka thënë se Izraeli nuk është i përgatitur për luftë kundër grupit terrorist libanez të mbështetur nga Irani, pasi sipas tij, shteti izraelit “turpërohet” nga humbjet në luftën kundër Hamasit në Gazë.
Raad tha se është nder për Libanin që grupet “e rezistencës” e luftojnë Izraelin duke e akuzuar shtetin hebre si “plaçkitës të pasurisë, për kontrollimin e rrugëve detare, dhe imponim të vullnetit të popullatës”.
Gjithashtu, ai tha se Izraeli është duke pësuar disfatë në Gazë dhe se “ka dështuar të arrijë qëllimet e tij” në çdo aspekt.
“Armiku izraelit është i detyruar të tërhiqet sepse është i lodhur dhe po përballet me një rezistencë që nuk e priste”, shtoi Raad.
“Armiku izraelit nuk është gati për luftë përballë asaj që rezistenca islamike në Liban ka përgatitur për të”, pohoi ai.
Ndryshe, këto tensione janë zgjeruar si rrjedhojë e konfliktit midis Izraelit dhe Hamasit, dhe sulmeve ndaj anijeve ndërkombëtare në Detin e Kuq.
Izraeli së fundmi është shprehur kundër krijimit të një shteti palestinez, por SHBA-ja është zotuar të angazhohet në një zgjidhje për të dy palët. /Telegrafi/