Përvojat e ndryshme muzikore po vijojnë te Lumbardhi i Prizrenit në kuadër të programit Skaj Session.
Në skenë këtë herë janë paraqitur Heavenphetamine dhe Kolektiv Radio, duke sjellë tinguj të larmishëm për publikun e pranishëm.
Grupi Heavenphetamine nga Japonia i përbërë nga Sara dhe Hiroki Oda, që luajnë në bateri respektivisht tastierë, sipas njoftimit të Lumbardhit, kanë përzier në mënyrë dinamike kompozime elektronike me ritme punk. Muzika e tyre me ndikime prej muzikës perëndimore indie si dhe të melodive, ritmeve dhe vargjeve japoneze ka krijuar një tablo ekzotike muzikore, në kopshtin e Kino Lumbardhit.
Sipas dyshes japoneze kjo është hera e parë që ata paraqiten në Kosovë, pas një turneu në vende të ndryshme të Evropës. “Shpresojmë që të rikthehemi sërish në Kosovë”, janë shprehur muzikantët e Heavenphetamine.
Krahas tyre, sipas njoftimit, në skenë janë ngjitur edhe anëtarët e Kolektiv Radio, një stacion radiofonik që promovon muzikë underground nga rajoni dhe gjithë bota. Një nga qëllimet e tyre është që të eksperimentojnë me praktika dhe mjete të ndryshme muzikore duke fuqizuar të rinjtë të gjejnë qasje në prodhime dhe përjetime në zhanre të ndryshme, duke zbuluar tinguj për të vallëzuar, qetësuar dhe frymëzuar. Në këtë kuadër, Raspasan dhe Bazi Zabi (Tevfik Rada dhe Ramiz Laçi) kanë shpalosur një listë muzikore për të kompletuar edhe një mbrëmje të veçantë të Skaj Session.
Skaj Sessions do të vijojë me performanca tjera muzikore në javët në vijim./Telegrafi/.