Werder Bremen nuk ka pasur një edicion të mirë së paku deri më tani, kur kanë kaluar 17 javë në Bundesliga.
Skuadra e madhe gjermane ka mbetur në pozitën e parafundit në tabelë, me vetëm 14 pikë, pozitë që e dërgon në Bundesliga 2.
Edhe pse skuadra ishte e ndërtuar me transferime të reja për të luftuar për një vend në Evropë, te Werderi nuk ka shkuar thuajse asgjë siç duhet.
Transfermarkt ka bërë një artikull ku e ka cilësuar si gjysmë stinor të dështuar të Werderit, por me vetëm një fije shprese e që ajo është Milot Rashica.
Edhe pse klubi gjerman ka shumë lojtarë me emër dhe përvojë, mediumi gjerman i ka kritikuar tej mase duke shkruar se nuk e kanë kaluar provimin.
“Lojtari i vetëm që e ka kaluar provimin te Werder është Milot Rashica, që ka shënuar shtatë gola në kampionat dhe ka bërë tre asistime. Werderi mund të shpëtoj vetëm nëse edhe tjerë lojtarë arrijnë nivelin e Rashicës”.
Por klubi bardh e gjelbër mund të mbetet pa Milotin në janar, pasi ofertat për të nuk mungojnë.
Aston Villa e kërkon me ngulm yllin kosovar në Ligën Premier, teksa edhe Borussia Dortmund ka shprehur interesim për të.
Werder nuk po dëshiron shitjen e Rashicës, pasi në këtë mënyrë do të rrezikonte rënien, por nëse vije një ofertë mbi 40 milionë euro, atëherë do të detyroheshin të pranonin në mënyrë që të fitonin shumë nga largimi i reprezentuesit kosovar. /Telegrafi/