Një gjykatë në Pakistan ka shkaktuar reagime pasi liroi një person të dënuar për përdhunim kur ai pranoi të martohej me gruan që përdhunoi.
Dawlat Khan, 25 vjeç, ishte dënuar me burgim të përjetshëm në maj nga gjykata e qarkut të Buner, në provincën veriperëndimore Khyber Pakhtunkhwa, për përdhunimin e një gruaje të re të shurdhër, transmeton Telegrafi.
Pas një ndërhyrje nga këshilli i pleqve u arrit një marrëveshje midis Khan dhe familjes së gruas, e cila kishte një fëmijë si rezultat i aktit. Khan u lirua të hënën pasi marrëveshja u pranua nga gjykata e lartë e Peshawarit.
“Palët e kanë rregulluar çështjen me ndërhyrjen e të afërmve dhe të moshuarve të familjarëve, gjë që është në interesin më të mirë të palëve. Kompromisi u arrit në interesin më të mirë të fëmijës dhe nënës së tij duke qenë me nevoja të veçanta”, thuhet në dokumentin e gjykatës.
Vendimi ka nxitur reagimin te grupet e të drejtave dhe aktivistët që thonë se legjitimon dhunën seksuale ndaj grave në Pakistan, ku shumica e rasteve të përdhunimeve nuk raportohen.
Ato që raportohen janë të vështira që të ndiqen penalisht në Pakistan, sipas Asma Jahangir e “Legal Aid Cell”, një grup që mbështet gratë e rrezikuara. Shkalla e dënimit është e ulët – më pak se 3 për qind sipas OJQ-së me bazë në Karaçi “Lufta kundër përdhunimit”.
Kërcënimet dhe detyrimet nga familja dhe shoqëria në rastet e përdhunimeve janë të zakonshme, dhe të mbijetuarit dhe familja në përgjithësi e zgjidhin çështjen jashtë gjykatës nga frika e stigmës së një gjyqi. /Telegrafi/