Gazetarja afgane, Masooma Gholamy, e cila u detyrua të ikte nga vendi për shkak të ngjarjeve të fundit në vend, ka deklaruar se talebanët nuk i konsiderojnë gratë si qenie njerëzore.
“Ishte shumë e vështirë për një grua të mbajë një punë në Afganistan edhe para talebanëve. Por pasi ata u kthyen në pushtet, gjërat u përkeqësuan shumë. Ne nuk mund të funksionojmë më”, ka deklaruar Gholamy për Euronews.
Deri këtë verë, ajo po prezantonte lajmet për Tamadon TV në Kabul, por kur talebanët morën pushtetin, ajo u largua nga vendi me fëmijët e saj dhe u vendos në Athinë, Greqi.
“Talebanët nuk na shohin si qenie njerëzore. Talebanët as nuk mund të ulen në të njëjtën tryezë dhe të flasin me një grua, ata besojnë se kjo është e turpshme”, vazhdoi ajo.
Nëna e tre fëmijëve nuk jeton më me babanë e fëmijëve të saj, për shkak të tensioneve në lidhje me punën e saj si moderatore televizive.
Talebanët kurrë nuk do të kishin lejuar një grua të punonte në sytë e publikut. /Telegrafi/