Kampionatet
Liga Premier: Java e 11-të në Ligën Premier fillon me ekipin më të mirë anglez për momentin, Tottenhamin, që do ta vizitojë Boltonin. Wolves, që ia treguan vendin Manchester Cityt të dielën e kaluar, tani do të tentojnë që ta befasojnë Manchester Unitedin në Old Trafford. Qytetarët në krizë të Manchester Cityt, do të kërkojnë ringjalljen ndaj WBA-së. Para kësaj, Arsenali do të shikojë se si të rikthehet pas zhgënjimit në Ligën e Kampionëve kur të presë Newcastle në Emirates.
Dhe si zakonisht për fund në Ligën Premier rezervohet ëmbëlsira, që këtë fundjavë sheh përballë Chelsean në top formë dhe Liverpoolin në krizë.
Joe Cole do të ketë përballë dashurinë e vjetër, jo Drogbën, por Chelsean…
La Liga: Derbi i kryeqytetit e dominon fundjavën në La Liga, me Atletico Madridin që do të udhëtojë vetëm disa kilometra për t’u përballur me liderët aktualë të La Ligas. Atletico Madrid ka fituar vetëm dy ndeshje në Bernabeu brenda dy dekadave. Barcelona ka rastin për të uzurpuar një pjesë të Madridit, kur do ta vizitojë Koloseumin Alfonso Perez të Getafes.
Villareali do të shikojë se si të zgjerojë më tutje pamposhtshmërinë, e cila tashmë hyn në ndeshjen e tetë, kur nëndetësja e verdhë të presë Athletic Bilbaon tejet të papërshtatshëm.
Java e dhjetë në Kampionatin spanjoll përfundon me derbin tjetër mes Sevillas dhe Valencias, të cilat do të ndeshen për të shënuar fitoren e parë pas tri ndeshjeve. Sevilla do të tentojë që ta harrojë sa më shpejt masakrimin që ia bëri Barcelona në Camp Nou.
"Patjetër duhet ta mposhtim Atleticon" – thotë CR7 i cili do të tentojë ta zhvendosë ekuilibrin edhe ashtu të ç’ekuilibruar të Los Colchoneros!
Serie A: Pasi takimit Inter – Brescia të shtunën pasdite, e diela do të jetë plot e përplot aksion në Itali. Mos e harroni Chievon në top formë që ndeshet me Fiorentinën në krizë të thellë, ndërsa Milani i shkon Barit në ndeshjet që zhvillohen mesditën e të dielës. Juventusi më vonë takohet me Sienën, kurse Palermo e pret Genoan, para se t’i qasemi një sfide inkandeshente në mbrëmje.
Po, është derbi i Romës. Lideri i Serie A, Lazio, do duhet të kalojë rrugicën për ta vizituar stadiumin në pronësi të Romës, që pa Francesco Tottin, do të paraqitet në një ndeshje e cila medoemos duhet shikuar.
Derbi romak pa tensione, nuk mund të quhet derbi i vërtetë gladiatorësh…
Bundesliga: Tashmë është luajtur ndeshja Schalke – St.Pauli që pati për fitues Mbretërit e Kaltër, të cilët festuan pos tjerash zgjimin nga gjumi vjeshtor të Raulit dhe Huntelaarit. Të shtunën Bayerni i shkon Gladbachut, kurse Mainzi do të takohet me Freiburgun, ndërsa ndeshja kryesore është rezervuar për të dielën, kur Hamburgu do të ketë punë me Hoffenheimin.
Luani të cilit kurrë nuk i humbet dëshira për gjah!
Por, çfarë mendoni ju lexues të nderuar, a do t’ia shkaktojë Atletico humbjen e parë Realit? Cili është derbi më i madh i kësaj jave? A do të arrijë Roma t’ia tregojë vendin Lazios, pa legjendën Totti? Shprehuni në hapësirën për komente…
/Telegrafi/