Fundjava nëpër Evropë

 

Kampionatet

Liga Premier: Java e 13-të në Ligën Premier nis me rivalitein e vjetër mes Aston Villas dhe Manchester Unitedit. Pas një barazimi në derbin e Mançesterit, Manchester City do të kërkojë gola kur pret Birminghamin këtë javë. Tottenhami rastësisht e pa veten në një seri prej tri ndeshjeve pa fitore, përderisa Spursat presin këtë javë Blackburnin në White Hart Lane. Të shtunën e përmbyll vizita e Liverpoolit te Stoke City.

Janë dy ndeshje që do të zhvillohen të dielën. Arsenali do të ketë udhëtim të vështirë te Evertoni, përderisa Chelsea do t’i shkojë Sunderlandit për të rumbullakësuar një fundjavë plot aksion në Ligën Premier.

Djajtë duhet ta djegin Villën, sepse Chelsea po ikën drejt parajsës…

La Liga: Të shtunën ndeshja më e madhe dhe më e mirë është Barcelona përballë Villarealit. Ndeshjet mes këtyre dy skuadrave gjithnjë kanë qenë interesante, me Nëndetësen e Verdhë që do të tentojë ta mposhtë Barcelonën.

E diela starton me sfidën Zaragoza-Sevilla. Andaluzianët janë tejet të paqëndrueshëm, përderisa Zaragoza mezi pret t’i ikë zonës së rrezikshme, me vetëm një fitore të arritur javën e kaluar për këtë sezon.

Sporting Gijoni do ta presë në El Molinom Real Madridin e pamposhtur deri në këtë fazë, para se kjo javë në La Liga të përmbyllet me ndeshjen e Valencias ndaj Getafes.

David Fuster ia bëri bajat Barcelonës një vit më parë, por kush e ka radhën tani?

Serie A: Ka aq shumë ndeshje të mëdha këtë fundjavë, sa që nuk dimë nga t’ia fillojmë. Vëmendje të shtunën për Juventusin që pret Romën, para se Lazio të ketë rastin për ta rimarrë kreun në Serie A ndaj Napolit.

Palermo ndaj Catanias do të jetë trilleri i të dielës pasdite, ndërsa vlen të shikohet edhe ndeshja e Cagliarit ndaj Genoas me trajner të ri.

Por, të gjithë sytë do të jenë të kthyer kahë San Siro për derbin milanez të së dielës mbrëma. Humbja për Interin do të thoshte gjashtë pikë distancë nga Milani që është lider dhe për këtë arsye, kjo sfidë do jetë jashtëzakonisht e paparashikueshme.

Ibrahimovic përkëdhel djemt e tij, për t’i ndihmuar ta mposht vetveten…

Bundesliga: Tashmë aksioni në Kampionatin gjerman ka filluar me fitoren e Dortmundit të pandalshëm ndaj Hamburgut. Të shtunën ndeshja kryesore sheh Wolfsburgun të përballet me Schalken.

Mainz ndaj Hannoverit poashtu vlen të shikohet, ndërsa e diela do të ketë për subjekt derbin bavarez mes Bayernit dhe Nurnbergut ku pritet rikthimi i të lënduarit Franck Ribery.

Çfarë mendoni ju lexues te nderuar, a do të triumfojnë favoritët këtë javë, apo do të shohim ndonjë befasi të dorës së parë? Kush do dalin triumfues në derbit italianë të kësaj jave dhe çfarë mendoni për rikthimin e Franck Riberys në fushat e lojës? Shprehuni në hapësirën për komente…
 

/Telegrafi/