Telegrafi

Fjalët e para të Jose Mourinhos si trajner i Romës: Pres që klubi të më bëjë dhuratë në këtë afat kalimtar

Lavdim Pireva

Jose Mourinhos u prit nga tifozët e Romës si hero, në ditën e prezantimit, ku ishin mbledhur me qindra në aeroport, por edhe në qendrën stërvitore të klubit.

Në fjalët e para si trajneri i Romës ai u shpreh se do të krijojë një ekip fitues dhe se pret dhuratë nga klubi.

“Nuk mendoj se e meritoj mënyrën si u mirëprita sepse nuk bëra asgjë për ta. Ka edhe më shumë përgjegjësi mbi supet e mia”.

“Ne duam të bëjmë një Romë të suksesshme, por duam një të ardhme fitoresh, jo një moment të izoluar suksesi. Ne duam të bëjmë diçka të qëndrueshme dhe unë jam gati për këtë. Jam entuziast për këtë”.

“Unë dua të përshpejtoj procesin, padyshim që e di se ajo që po bëjmë është për nesër, por nuk është në natyrën time të pres shumë gjatë”, deklaroi Mourinho.

Ai pret që kryesia e klubit dhe drejtori sportiv, t’i bëjnë ndonjë dhuratë në këtë afat kalimtar.

“Shpresoj që pronarët dhe Tiago Pinto të më bëjnë disa dhurata, sepse do të isha i lumtur me ta. Do të ishte një stimul shtesë për mua”. /Telegrafi/