Është ende shumë herët të përshkruhet rrugëtimi i KB Rahovecit nga divizioni i ulët deri te kualifikimet për FIBA Europe Cup, por është sikurse të ishte një përrallë, që në fakt është.
Kështu fillon tregimi i faqes zyrtare të FIBA-s për klubin e Rahovecit.
Vetëm katër vite pasi arriti të futet në Superligë, gara më prestigjioze në Kosovë, ky klub i ri nga shteti më i ri evropian do të debutojë në skenën ndërkombëtare.
Rahoveci e pret skuadrën rumune U-BT Cluj-Napoca më 2 tetor, ngjarje që do të mbahet mend si historike për ekipin vendas, pa marrë parasysh rezultatin.
“Ne e shohim atë ndeshje si një shpërblim për gjithçka që klubi bëri në vitet e kaluara. Sigurisht që ëndërrojmë të shkojmë në fazën e grupeve, por dëshira është një gjë dhe realiteti është diçka tjetër. Ne jemi të vetëdijshëm sa e vështirë është të konkurrojmë me një skuadër të madhe si Cluj. Pra, qëllimi ynë i vetëm është që të paraqitemi sa më mirë që të jetë e mundur në FIBA Europe Cup”, ka thënë Neven Plantak, trajner i KB Rahovecit.
Trajneri kroat ka grumbulluar një ekipi nga lojtarët vendor dhe pesë përforcime të huaja për t’u përballur me homologët e tyre rumunë.
Një prej tyre është Jure Gunjina, i cili ka luajtur në Spanjë, Britani të Madhe dhe Islandë, përpara se të vendoset në Kosovë.
“Një nga gjërat që vura re së pari është se sa e madhe është dashuria ndaj basketbollit. Ky qytet i vogël ka edhe ekipin e futbollit, por basketbolli është diçka tjetër. Në sezonin e kaluar, palestra jonë mesatarisht kishte 2,000 tifozë në ndeshje. Edhe në ndeshje më të dobëta, ishte gjithnjë plot”.
“U-BT Cluj Napoca kanë buxhet më të madh dhe një ekip më të fortë, por ne do të kemi katër, ndoshta pesë mijë tifozë fanatikë pas shpinës në ndeshjen e parë”, ka thënë Gunjina.
Në Rahovec prodhimi i verës është një profesion për shumicën e banorëve. Edhe pseudonimi i ekipit është Vreshtarët (Fermerët e Verës), por basketbolli është diçka që kjo zonë e vogël po bëhet gjithnjë e më e famshme në vend.
Pothuajse suksesi erdhi brenda natës, pasi Rahoveci që erdhi nga divizionet e ulëta, në një garë evropian, sezonin shkuar i zhvilloi dy finale: Kupën e Kosovës dhe finalen e Superligës – të dyja të humbura nga Prishtina.
“Ishte sukses historik për klubin tonë që na lë pak hapësirë për përmirësim. Një gjë që mund të bëjmë është që të paktën ta përsërisim sezonin e kaluar. Një lojë kundër një kundërshtari të fortë si Cluj është provë e mirë për ne para se të fillojë sezoni. Do të shkojmë hap pas hapi dhe kualifikueset e FIBA Europe Cup janë hapi i parë”, përfundon Plantak intervistën e tij për FIBA. /Telegrafi/