Sigurisht që këtij rituali nuk kanë mundur t‘i shpëtojnë as yjet e mëdhenj të muzikës e kinemasë. Një prej tyre është edhe këngëtarja e njohur Christina Aguliera, e cila, para "hapit të madh" me Jordan Bratman, u "arratis" me mikeshat e saj në një plazh të Kalifornisë. Edhe aktorja Nicole Kidman bëri të njëjtën gjë, në shtëpinë e motrës së saj në Sidney, ku organizoi një festë të madhe pak ditë para se të martohej.
Ata që i kanë dhënë jetë këtij riti antik, i cili tashmë është kthyer në traditë, janë pikërisht anglosaksonët. Në Amerikë kjo lloj feste për femrat quhet "bachelor", ose "bachelorette party". Në Angli, këto festa për meshkujt quhen "stag-nigt", ose "hen-parties". Këtij rituali i janë kushtuar edhe shumë agjenci e faqe speciale interneti. Agjenci të ndryshme ofrojnë zgjidhje në paketa të ndryshme, duke përfshirë gjithçka. Ato ofrojnë udhëtime në Amsterdam, Pragë, Barcelonë e vende të tjera.
Po kush janë "huliganët" e rinj që kanë vendosur të martohen e t‘i nënshtrohen festës së beqarisë? Identifikimi ndryshon nga ai i dhjetë viteve më parë, sepse sot numri i martesa është ulur ndjeshëm dhe të rinjtë martohen në moshë të madhe. Femrat martohen rreth moshës 29 vjeçe, ndërsa meshkujt 33, dhe në këtë mënyrë kanë më shumë mundësi ekonomike. "Martesa ka shumë shpenzime dhe festa e beqarisë po ashtu", pohon një psikologe. Nga një kërkim i bërë kohët e fundit, është vënë re se miqtë e çifteve angleze shpenzojnë 360 sterlina për t‘iu bashkuar festës së beqarisë, shpenzime këto ku përfshihen udhëtimi, prenotimi, restoranti, ushqimi dhe mbrëmja në diskotekë.
"Beqarët kanë gjithnjë tendencë të shkojnë sa më larg të jetë e mundur, ndoshta për të shmangur gafat e shumta", pohon psikologja. "Shumica e klientëve vijnë nga jashtë. Ata prenotojnë vetëm darkën dhe tavolinën në diskotekë, ndërsa të tjerë preferojnë të dëfrehen me miqtë gjithë fundjavës e në ndonjë rast prenotojnë hotel buzë rivierës", pohon një punonjëse agjencie. Tarifat variojnë në bazë të kërkesave: 30 euro vetëm për darkën, 180 euro nëse klientët dëshirojnë striptizë, ndërsa për prenotim dhe fundjavë, tarifa është më e lartë.
A ka kërkesa të çuditshme? "Të zakonshmet. Femrat preferojnë meshkujt që zhvishen, ndërsa burrat ‘çokollatat‘ braziliane", tregon punonjësja. Por të rinjtë nuk preferojnë vetëm prenotimet në hotelet e shtrenjta. Ata mendojnë se festat e bëra vetë në shtëpi janë më shik. "Është nusja ajo që u lë të tjerëve të kuptojnë se me kë dëshiron të festojë dhe ku. Më pas janë miqtë e saj të ngushtë që organizojnë gjithçka", tregon një vajzë 27-vjeçare, e cila po përgatit një festë beqarie për tri ditë në Sant Tropez. Çfarë organizoni dhe a ka shpenzime? "Sigurisht që ka shpenzime, por kjo nuk llogaritet me kënaqësinë dhe dhuratat që merr në këmbim. Para se të nisemi për udhëtim, marrim me vete sende të ndryshme: kostume banje, veshje ekstravagante, prezervativë, libra mbi martesën dhe revista për të kaluar kohën", tregon ajo. Sigurisht edhe meshkujt nuk përjashtohen nga ky program: "Ne ishim katër shokë dhe festimet u përqendruan mbrëmjen e ditës së shtunë. Përveç apartamentit që e kishim marrë me qira për dy ditë, organizuam darkë në restorant, rezervuam një tavolinë në diskotekë, por pa ftuar balerina e aq më tepër me pagesë. Shpenzimet ishin disa qindra euro, një shifër e vogël, që mund të përballohet edhe nga ata që nuk kanë të ardhura financiare", pohon një djalosh.
"Me fjalë të tjera, një festë beqarie lejon të mbështetesh te miqtë e tu më të ngushtë dhe të rigjesh sërish vetveten përpara hapit të madh. Shoqëria është një trampolinë e sigurt dhe e vërtetë në fillimin e jetës së re. Është mirë që të provojmë gjithçka para se të fillojmë jetën martesore, për të mos u penduar më vonë. Festa e beqarisë tregon fundin e një cikli dhe fillimin e një cikli tjetër të ri, në të cilin nuk duhen harruar kurrë momentet e bukura të jetës", konfirmon psikologjia.
Por sot gjërat kanë ndryshuar. Nëse dikur ishte burri ai që humbiste lirinë, ndërsa gruaja realizonte ëndrrën e saj duke u bërë bashkëshorte e më pas nënë, sot e "vuajnë" të dy së bashku këtë "dënim" dhe për ta zbutur sadopak "dhimbjen", organizojnë festat e beqarisë. /shqip/