Marcus Rashford, Jesse Lingard, Ashley Young dhe Timothy Fosu-Mensah, i kanë bërë një vizitë Paddy Lawler, pasi një kushëri i Lingardit e kishte parë një postim zemërthyes në Facebook.
Mbesa e Paddyt, Kayleigh, kishte shkruar se 73-vjeçari ishte përpjekur me çdo kusht t’i mbante sytë hapur për ta përcjellë derbin e Djajve të Kuq kundër Manchester Cityt të shtunën.
Në shkrimin e saj, ajo njëherësh kërkonte që dikush prej lojtarëve të klubit ta vizitonte fansin e tyre të madh.
Futbollistët ishin prekur aq sa vendosën që ta vizitonin plakun në shtëpinë e tij në Wythenshawe të Mançesterit.
Pasi e përjetoi këtë befasi të këndshme, kaluan vetëm 45 minuta dhe Paddy ndërroi jetë.
“Ata u treguan djem shumë të mirë duke bërë gjithë atë dhe është një ngushëllim i madh për ne ta dimë se ai vdiq i lumtur”, ka thënë e veja e tij, 71-vjeçarja Eunice, për The Sun. /Telegrafi/