Dy ekipet shqiptare, BLINK dhe XTEAM u përballën në gjysmëfinale të turneut CS:GO Champs në sheshin ‘Zahir Pajaziti’ në Prishtinë, ku fitues doli ekipi i BLINK pas një ndeshje fantastike me rezultat të përgjithshëm 2:1 me mapa.
Ndeshja filloi me fitore të mapit të parë nga ekipi i XTEAM me rezultat 16:12, por ekipi i BLINK arriti që të rikthehet në mapin e dytë duke e fituar me rezultat 16:11, për ta dërguar ndeshjen në mapin e tretë dhe vendimtar.
Mapi i tretë ishte i barabartë shumicën e kohës, por disa raunde fantastike nga ekipi BLINK, arritën që ta përmbyllin mapin me rezultat 16:14, dhe ndeshjen me rezultat të pergjitshëm 2:1 me mapa për të siguruar finalen, kundër ekipit nga Maqedonia, BlueJays.
Gjatë kësaj ndeshje në sheshin Zahir Pajaziti ishte prezent edhe Kryeministri i vendit, Albin Kurti.
Ndeshja finale do të zhvillohet sot (e shtunë) rreth orës 17:00, ku për vendin e parë do të ndahen 5.000 euro, ndërsa për vendin e dytë 2.000 euro. /Telegrafi/
