Trupat ndërkombëtare planifikojnë të qëndrojnë në Afganistan përtej afatit të muajit maj të parashikuar nga marrëveshja mes talibanëve dhe Shteteve të Bashkuara, thanë katër zyrtarë të lartë të NATO-s.
Ky është një veprim që mund të përshkallëzojë tensionet me talibanët që kërkojnë tërheqjen e plotë të amerikanëve.
“Nuk do të ketë tërheqje të plotë nga aleatët deri në fund të prillit”, pohoi për Reuters një nga zyrtarët e aleancës.
“Kushtet nuk janë përmbushur”, tha në kushte anonimiteti për shkak të ndjeshmërisë së çështjes. “Dhe me administratën e re të SHBA-së, do të ketë ndryshime në politikë, sensi i tërheqjes së nxituar që ishte i përhapur do të adresohet dhe ne mund të shohim një strategji shumë më të llogaritur të daljes”, shtoi ai.
Administrata e presidentit të atëhershëm, Donald Trump nënshkroi një marrëveshje me talibanët në fillim të vitit të kaluar duke kërkuar tërheqjen e të gjithë trupave të huaj deri në maj, ku kryengritësit do të përmbushnin disa garanci të sigurisë.
Trump e përshëndeti marrëveshjen – e cila nuk përfshinte qeverinë afgane – si fundin e dy dekadave të luftës. Ai zvogëloi trupat amerikane në 2,500 brenda këtij muaji, më pak nga viti 2001. /Telegrafi/