Elvis Rexhbeçaj e ka nisur sezonin në mënyrën më të mirë, duke e gjetur golin në ndeshjen hapëse të Bundesligas, ku Augsburgu barazoi me Werder Bremen me rezultat 2-2.
mesfushori Rexhbeçaj realizoi edhe të dielën e kaluar në fitoren 4-1 të Augsburgut në udhëtim te Viktoria Berlini, në raundin e parë të Kupës së Gjermanisë, ndërsa shkëlqeu edhe në këtë fundjavë.
Mesfushori i ri i Kosovës realizoi gol me gjuajtje shumë të fuqishme nga 28 metra distancë.
Elvis Rexhbecaj 🫡#bundesliga #bulifi pic.twitter.com/tz5J2CTuRz
— Viaplay Urheilu (@ViaplayUrheilu) August 24, 2024
26-vjeçari i cili me shumë gjasa do të jetë në listën e Franco Fodas për ndeshjen e parë të Kosovës në Ligën e Kombeve kundër Rumanisë, po tregon formë të lartë pasi i ka thënë “po” Dardanëve.
Rexhbeçaj pas ndeshjes ka folur për faqen zyrtare të Augsburgut, ku është shfaqur i lumtur me golin e shënuar, por i dëshpëruar që ekipi i tij nuk mori pikët e plota.
“Jam padyshim shumë i kënaqur që gjuajtja ime përfundoi me gol të shënuar dhe Samueli më pas realizoi tjetër gol. Nuk jemi të kënaqur pasi nuk morëm pikët e plota. Ishim më sulmues se kundërshtari dhe ishin dy situata të diskutueshme të cilat nuk u dhanë në favorin tonë”.
“Të dyja klubet donin të luanin lojë sulmuese, e cila nuk ishte e lehtë, veçanërisht për shkak të temperaturave. Natyrisht ne kishim dëshirë që të kalonim të parët në epërsi, por po ashtu ishte e rëndësishme që të ishim në gjendje ta kthenim lojën në të mirën tonë”, deklaroi Rexhbeçaj.
Ndeshjen e radhës në Bundesligë, Augsburgu e zhvillon në udhëtim te Heidenheimi më 1 shtator.
Pas atij ballafaqimi, Rexhbeçaj pritet t’i bashkohet Kosovës që luan më 6 shtator kundër Rumanisë në Prishtinë.
“Tani duhet të punojmë për ndeshjen e ardhshme dhe ta mbajmë intensitetin e lartë në mënyrë që të sulmojmë sërish në javën tjetër dhe të mos bëjmë gabime”, përfundoi ai Rexhbeçaj.
Mesfushori qendror është pjesë e Augsburgut prej korrikut të vitit 2022 kur u transferua nga Wolfsburgu. Ai ka bërë karrierë edhe te Bochumi e Kolni.
Rexhebeçaj ka zhvilluar 160 paraqitje në Bundesligë, ndërsa ka 10 gola të shënuar e tetë asistime në total. /Telegrafi/