UEFA e ka konfirmuar zyrtarisht , se ndeshja mes Linfield dhe Dritës është regjistruar me rezultat zyrtar 3-0.
Ndeshja në fjalë ishte e vlefshme për rundin preliminar të Ligës së Kampionëve, derisa ishte paraparë të luhej dje në Nyon të Zvicrës.
Megjithatë, pas rasteve pozitive me COVID-19 te klubi gjilanas, autoritetet zvicerane në koordinim me UEFA-n anuluan ndeshjen.
Drejtori sportiv i Dritës, Valon Zymberi ka folur në lidhje me rrugëtimin e skuadrës gjilanase në garat evropiane. Pas rënies nga Liga e Kampionëve, Drita do të bie në Ligën e Evropës.
“Po, ndeshjen e kemi humbur me rezultat zyrtar. Garat do t’i vazhdojmë në Ligën e Evropës”, deklaroi të mërkurën Valon Zymberi për “Zeri.info”.
Ai tutje shtoi se klubi do të kërkojë drejtësi në instancat më të larta dhe për këtë ka folur me avokat nga Anglia dhe Italia.
“Jemi të bindur një milion për qind në drejtësi dhe në pafajësinë tonë. Tashmë kemi nisur kontaktet edhe me disa avokatë të huaj”, deklaroi Valon Zymberi.