Kampioni i Kosovës Drita të martën do të zhvillojë ndeshjen më të rëndësishme në histori, derisa në kuadër të rrethit të parë kualifikues për Ligën e Kampionëve do të përballet me kampionin suedez Malmon.
Për këtë takim të rëndësishëm trajneri Bekim Isufi nuk do të mund të llogaritë në mbrojtësin Fidan Gërbeshin, i cili u ndëshkua me karton të kuq në duelin e rrethit paraprak ndaj Lincoln.
Por, lajme të mira vijnë për kapitenin Ardian Limanin, i cili pavarësisht se mori dy kartonë në fazën paraprake do të ketë mundësi që të paraqitet në këtë sfidë.
Kësisoj dyshen në qendër të mbrojtjes do ta formojnë Ardian Limani dhe Liridon Leci.
Ndërkohë në krahun e majtë do të jetë njëri mes Arbër Shalës dhe Denis Halitit.
Kryetrajneri i Dritës nga kjo ndeshke mund të llogarisë edhe në dy përofrcimet nga rivali lokal Gjilani, Betim Haxhimusën dhe Zgjim Mustafën.
Ndeshja e parë ndërmjet Dritës dhe Malmos pritet të zhvillohet më 10 korrik në stadiumin Adem Jashari në Mitrovicë me fillim nga ora 20:45. /Telegrafi/