Drejtoria Rajonale e Policisë në Gjilan ka njoftuar se është zhvendosur nga objekti në të cilin kanë operuar deri tani, duke kaluar në ish-objektin e QKMF-së, i cili është dhënë në shfrytëzim nga Komuna e Gjilanit.
Përmes një komunikate për media, Policia në rajonin e Gjilanit njofton se kjo zhvendosje është bërë me qëllim të përmirësimit të shërbimeve të tyre dhe ofrimin e një ambienti më të përshtatshëm të punës.
“Dislokimi është bërë me qëllim përmirësimin e shërbimeve tona dhe ofrimin e një ambienti më të përshtatshëm për punë për punonjësit e kësaj Drejtorie. Ky objekti ofron hapësira më të mëdha dhe më komode, që do të lejojnë organizimin më mirë të aktiviteteve duke ofruar shërbime të shpejta dhe efikase për qytetarët”, thuhet në komunikatën e tyre.
Me këtë rast Drejtori i Drejtorisë Rajonale në Gjilan, Agrom Rukiqi i ka ndarë mirënjohje Kryetarit të Komunës së Gjilanit për mbështetjen e vazhdueshme.
“Drejtoria Rajonale e Policisë në Gjilan është e përkushtuar të vazhdojë me përmirësimin e shërbimeve dhe të jetë në shërbim të qytetarëve”, thuhet tutje në komunikatë. /Telegrafi/