Drejtoresha e Arsimit në Gjakovë, Eranda Kumnova-Baci, ka reaguar ashpër ndaj ministres së Arsimit, Arbërie Nagavci, duke kritikuar për mungesën e komunikimit dhe përfshirjes nga ana e ministrisë në një situatë të rëndë që ka prekur shkollat e Gjakovës.
Kjo kritikë vjen pas postimit të Nagavcit për Ditën Ndërkombëtare të Vajzave, ku theksoi vëmendjen e qeverisë ndaj vajzave dhe përpjekjet për fuqizimin e tyre.
Në reagimin e saj, Kumnova-Baci tha se gjatë javës së fundit, përkundër situatës alarmante në shkolla, nuk ka pasur asnjë telefonatë, komunikim apo vizitë nga Ministria e Arsimit.
Ajo theksoi se mungesa e vëmendjes dhe mbështetjes nga ministria në një moment kur shkollat po përballen me sfida serioze është e papranueshme.
Drejtoresha përmendi veçanërisht një incident të rëndë në të cilin tri nxënëse kanë shkaktuar lëndime vetes në një shkollë të Gjakovës, si pjesë e një sfide të rrezikshme në rrjetin social TikTok.
Kumnova-Baci vuri në dukje se ky problem duhet të ishte trajtuar me përparësi nga Ministria e Arsimit, duke përfshirë vizita në Gjakovë, takime me drejtorët e shkollave dhe marrjen e masave të menjëhershme.
Ajo kritikoi postimin e Nagavcit për Ditën e Vajzave, duke thënë se fjalët për mbështetjen e vajzave janë në kontrast me mungesën e veprimit konkret nga ministria gjatë kësaj periudhe sfiduese. Sipas saj, kjo situatë kërkonte krijimin e një task force dhe marrjen e masave emergjente për të adresuar problemet që po përballen vajzat dhe shkollat në Gjakovë.
Sfida e rrezikshme në TikTok dhe incidentet e lëndimeve të vetëshkaktuara nga nxënëset kanë ngritur shqetësime të mëdha në komunitetin e arsimit, dhe kritikat e Kumnova-Bacit synojnë të theksojnë nevojën për një përgjigje më të fortë nga autoritetet arsimore./Telegrafi/
