Një pjesë e qytezës së Shtimes dhe disa lokalitete përreth po vazhdojnë të kenë telashe me energjinë elektrike. Përveç reduktimeve të shpeshta, atyre nuk po u funksionon një linjë e energjisë.
Veli Ademi, banor në rrugën “Komandant Kumanova” që gjendet përgjatë rrugës Shtime-Ferizaj, ka thënë se prej disa ditësh po përballen me mungesë të energjisë elektrike. Sipas tij, një linjë e energjisë nuk po funksionon fare.
Ai ka shtuar se edhe lokalitetet përreth qytetit të Shtimes po vazhdojnë të përballen me mungesë të energjisë elektrike.
“Mbi 65 familje dhe biznese përgjatë kësaj rruge po përballemi me mungesë të një linje të energjisë elektrike, përveç asaj që shpeshherë po ka reduktime. Po kemi shpenzime mbi 70 euro në ditë sepse po duhet të mbajnë të ndezur vazhdimisht gjeneratorët. Kemi kërkuar nga KEDS- i të kemi shërbime cilësore ashtu siç jemi taksapagues të rregullt, por deri tash nuk kanë marrë parasysh”, është ankuar Ademi.
Telegrafi, ditë më parë ka raportuar se banorë të fshatrave Belinc , Carraleve, Ranc dhe Pjetershticë të Komunës së Shtimes, prej disa muajve po ankohen për mungesë dhe reduktime të energjisë elektrike.
Banorët patën deklaruar se janë ankuar disa herë në zyret e KEDS-it por deri më tash nuk kanë marrë përgjigje lidhur me reduktimet e vazhdueshme.
KEDS- i prej disa ditësh nuk u është përgjigjur pyetjeve të telegrafit lidhur me ankesat e qytetarëve për energji elektrike në regjionin e komunave të Ferizajt. /Telegrafi/