“I dërguar nga lartë”, faqja e Man Utd e lartëson Ronaldon pas golit të fitores ndaj Norwichit

Faqja zyrtare e Manchester United e ka lartësuar figurën e sulmuesit të tyre kryesor të skuadrës, Cristiano Ronaldo, i cili po vazhdon të jetë vendimtar në rezultatet e ekipit këtë sezon.

Manchester Unitedi ka fituar me vështirësi dhe rezultat minimal 1-0 në udhëtim te Norwich City në ndeshjen e vlefshme për javën e 16-të në Ligën Premier.

Goli i vetëm në këtë fitore të Djajve të Kuq u shënua në minutën e 75-të me anë të portugezit Ronaldo, i cili ishte i saktë nga penalltia.

Lexo po ashtu Man Utd fiton me vështirësi ndaj Norwichit, Ronaldo hero i Djajve të Kuq

Kjo nuk është hera e parë që ylli portugez është vendimtar në fitoret e Unitedit, edhe përkundër se është lojtari më i vjetër në skuadër, me 36 vjet.

Figura e tij vazhdon të lartësohet në Old Trafford dhe një gjë të tillë e ka konfirmuar vetë faqja zyrtare e Djajve të Kuq me anë të një postimi.

“I dërguar nga lartë”, është shkrimi i faqes zyrtare të Unitedit në rrjetin social Twitter.

Ronaldo deri tani këtë sezon ka zhvilluar 19 ndeshje, teksa ka shënuar 13 gola mes Ligës Premier dhe Ligës së Kampionëve, ku shtatë vijnë nga kampionati dhe gjashtë në garën evropiane. /Telegrafi/