Ndeshja e gjeneratës së artë të Belgjikës kundër nënkampionit evropian, Italisë, është ndoshta më interesantja e fazës grupore të ‘Euro 2016’.
Belgjika e Italia përballen sot (e hënë) nga ora 21:00 në Stade de Lyon.
Të dy skuadrat përbëhen nga emra të njohur, fitues të Ligës së Kampionëve dhe në rastin e Italisë edhe kampion të botës.
Është një ndeshje ideale për të prezantuar në skenën ndërkombëtare stadiumin e ri të Lyonit, Stade de Lyon, që ka kapacitet prej 59 mijë ulëseve.
Arena është hapur në janar dhe do të presë gjashtë ndeshje të Evropianit duke përfshirë edhe gjysmëfinalen e parë.
Shumë njerëz presin që gjenerata e talentuar e Belgjikës të arrijë të paktën në gjysmëfinale. Por mbrojtja belge e goditur nga lëndimet, mbetet shqetësim, transmeton Koha Ditore.
Është rrëfim tërësisht i kundërt për Italinë, forca e së cilës mbetet mbrojtja. Skuadra e Antonio Contes ka shënuar vetëm 16 gola në 10 ndeshje kualifikuese, me Graziano Pellen e Southamptonit si golashënuesin më të mirë me tre gola.