Trajneri i Brighton, Roberto De Zerbi, pohoi se ai dëshiron të mbajë Moises Caicedon në ekipin e tij dhe të rikthejë Levi Colwill nga Chelsea.
Anglezi është lojtar i Bluve, ndërsa në sezonin e kaluar ishte në huazim te Pulëbardhat, por që londinezët nuk duan ta largojnë atë, ndërsa synojnë transferimin e ekuadorianit.
“Situata është shumë e qartë. Moises është një lojtar i Brighton”, ka thënë De Zerbi në konferencë për shtyp. “Kam folur me Tony Bloom dhe ai më tha nëse kushtet nuk ndryshojnë, Moises mbetet me ne”.
Kur u pyet për Colwill, trajneri i klubit nga Liga Premier u përgjigj: “Nuk më pëlqen të flas për lojtarët e klubeve të tjera. Unë flas për Caicedo sepse ai është lojtari ynë. Me Levin, jam krenar për të. Ai tregoi cilësinë e tij në U-21 Euro”.
De Zerbit nuk iu desh shumë kohë për të thyer premtimin dhe për të folur për mbrojtësin e Chelseat.
“Unë e filloj sezonin e ardhshëm me Caicedon në kokën time në 11-shen e parë. Dua Caicedon dhe Colwill në ekipin tim. Por, do të shohim. Dhe nëse ka lojtarë që duan të largohen, ne duhet ta lejojmë përfundimisht”, ka shtuar më tej ai.
Chelsea ka ndjekur nënshkrimin e Caicedos për muaj të tërë, ndërsa gjithashtu këmbëngul se Colwill nuk është në shitje, me Mauricio Pochettinon veçanërisht të interesuar për ta pasur atë në skuadër. /Telegrafi/