Jose Mourinho surprizoi jo pak në verë teksa zgjodhi të drejtonte Romën në Serinë A. Padyshim një sfidë kjo për portugezin teksa për të rikthyer verdhekuqtë në nivele të larta nuk do të jetë e lehtë, aq më tepër kur ekipi ka pasur nevojë për shumë ndryshime në organikë.
Rezultatet në javët e para ishin pozitive, mirëpo së fundmi, kryeqytetasit kanë vuajtur në fushën e blertë.
Gjithsesi, pavarësisht vështirësive Roma mban vendin e gjashtë në kampionat, ndërsa për një legjendë të italianëve si Daniele De Rossi, klubi duhet të mos e mërzisë teknikun luzitan pasi ka shumë punë dhe ai është në fillimin e projektit.
“Me çfarë mund të kënaqet Roma në fundin e sezonit? “Nëse nuk do të mërzisin edhe Mourinhon, i cili është një nga trajnerët më të fortë në qarkullim”, deklaroi legjenda e Giallorossëve.
“Pavarësisht pjesës estetike, Special One është një ndër pesë apo gjashtë trajnerët më të fortë të historisë. Unë e kam Romën në zemër, por tashmë është më mirë ta shikoj nga jashtë pasi nuk dua ta vendos veten në këpucët e Mourinhos”.
“Penalltia e gabuar nga Jorginho me Italinë? “Të gjithë goditësve të penalltive iu ndodhin të tilla gjëra, edhe Totti në një vit ka gabuar tre apo katër herë”, theksoi De Rossi. /Telegrafi/