Përzgjedhësi i Kroacisë, Zlatko Dalic, beson se fitorja ndaj Argjentinës në gjysmëfinale të Kampionëtit Botëror do të ishte suksesi më i madh historik i përfaqësueses së tij.
Pasi e drejtoi skuadrën drejt finales në Rusi në vitin 2018, trajneri ka vazhduar drejt një suksesi të radhës duke u kualifikuar në gjysmëfinale në Katar.
Të martën mbrëma, në këtë fazë, ekipi i tij përballet me Argjentinën e Lionel Messi në Lusail Stadium.
Kroacia u rikthye për ta mposhtur Anglinë pas vazhdimeve në Moskë në ‘Rusia 2018’ dhe pastaj humbi në finale nga Franca. Ndërsa 56-vjeçari thotë se triumfi i nesërm do ta tejkalonte fitoren e famshme ndaj Tre Luanëve.
“Ndeshja gjysmëfinale kundër Anglisë në Kampionatin e kaluar Botëror ishte ndeshja më e mirë e të gjitha kohërave, ajo ndaj Brazilit vjen e dyta”.
“Nëse fitojmë nesër (e martë), atëherë kjo do të ishte ndeshja më e madhe historike e Kroacisë. Është një prej më të rëndësishmeve, nga ndeshjet që kanë më së shumti vlerë për ne, që pas vetëm katër vitesh ta përsëritim suksesin, do të ishte një arritje shumë e madhe në skenën botërore…”.
“Jemi në mesin e katër ekipeve më të mira në botë, ky është një sukses i jashtëzakonshëm për Kroacinë, është gjë e madhe që në dy Kampionate Botërore radhazi të ndodhemi në mesin e katër përfaqësueseve më të mira në futboll”.
“Duam më shumë, luajmë ndaj Argjentinës së madhe, një skuadër e mrekullueshme e udhëhequr nga Lionel Messi, ata janë shumë të motivuar dhe nën presion më të madh se Kroacia në këtë moment”, ka deklaruar Delic. /Telegrafi/