Trajneri i Italisë, Antonio Conte, ka folur në konferencë për shtyp në ditën e parë të grumbullimit të kombëtares, duke komentuar listën prej 30 lojtarësh, që do të shkurtohet në 23 para Euro 2016.
“Duhet të bëjmë ende disa zgjedhje, këta që janë këtu janë më të mirët që kemi në këtë moment”.
“Insigne? Ka shanse të jetë mes 23 lojtarëve që do të shkojnë në Francë, si gjithë të tjerët. Krahasimi me Giovincon? Insigne di të luajë si sulmues, por edhe si anësor ofensiv, ndaj e kam preferuar”.
“Dyshime? Pak, thjesht duhet të mësojmë si do të jetë gjendja fizike e Thiago Mottas dhe Montolivos, sepse kemi pasur edhe dëmtimet e Marchisios dhe Verratit, ndaj duhet kujdes dhe nuk presim dot gjatë”.
“Pirlo e Giovinco jashtë Evropianit? I kemi vlerësuar me kujdes, kam folur me ta dhe u kam shpjeguar që nëse shkon të luash në Amerikë, paguan pasojat në aspektin futbollistik. Kam dërguar njerëzit e mi t’i vëzhgojnë, jemi menduar gjatë, e ka gabim kush mendon se jemi nxituar. Mendoj se kam zgjedhur lojtarët që më japin garanci”, ka thënë Conte.