Koreja e Veriut ka mbajtur paradën ushtarake me rastin e 73-vjetorit të themelimit të shtetit komunist, ku nga afër këtë paradë e ndoqi edhe lideri i këtij vendi – Kim Jong-Un.
Në fotografitë e publikuara më poshtë shihen ushtarët dhe punëtorët duke marshuar, e një pjesë e tyre ishin të veshur në rroba mbrojtëse të kuqe dhe me gaz maska, transmeton Telegrafi.
Siç raporton BBC, kjo ndoshta mund të jetë një shenjë se janë formuar forcat e veçanta që do të luftojnë përhapjen e mëtejme të coronavirusit.
Koreja e Veriut vuan nga mungesa e ushqimit dhe krizës ekonomike, si rezultat i pandemisë së COVID-19.
Por, kjo paradë ushtarake e mbajtur natën ka dalluar nga ato paraprake – pasi nuk është prezantuar ndonjë armë e re siç janë raketat balistike.
Njësia e veçantë në rroba të kuqe, kësaj radhe ka tërhequr vëmendjen e opinionit dhe besohet që Pyongyang me këtë dëshiron të tregoj popullit, se pavarësisht që nuk ka raportuar ndonjë rast me COVID-19, po vazhdohet lufta kundër përhapjes së mëtejme e coronavirusit.
Megjithatë edhe pse ekzistonte rreziku i madh nga tubimi, Pyongyang në 12 muajt e fundit ka mbajtur tri parada – që është e pazakontë edhe për vetë banorët e Koresë së Veriut. /Telegrafi/