Cassio shkruan historinë me një lëvizje gjeniale në portë: Ekipi kundërshtar filloi të festonte, por goli nuk u pranua

Në një ndeshje të Serie A braziliane mes Corinthians dhe Atletico Mineiro, portieri i corenthinezëve, Cassio lejoi të shënohej një gol nga një goditje e lirë në mënyrë të qëllimshme – dhe arsyeja ishte e jashtëzakonshme.

Në minutat e fundit të ndeshjes, me rezultatin 1-1, një moment i papritur bëri që stadiumi të mbetej me gojë të hapur. Pasi Mineiro fitoi një goditje të lirë, dhe pas goditjes së drejtpërdrejtë drejt portës nga kundërshtari, Cassio, duket sikur do të priste topin, por në çastin e fundit vendosi të linte topin të kalonte dhe të hynte në portën e tij.

Ky veprim çuditërisht i mençur çoi në diskutime në stadium, dhe edhe pse lojtarët e Mineiros filluan të festonin, ato ishin të parakohshme. Portieri 36-vjeçar shpejt kuptoi se goditja e lirë ishte indirekte dhe si pasojë, goli nuk do të pranohej nëse ai nuk e prekte topin, sepse askush tjetër nuk e kishte prekur pas ekzekutuesit të goditjes.

Sipas rregullave të futbollit, nëse një goditje e lirë indirekte hyn direkt në portë, loja rifillon nga porta e ekipit kundërshtar. Në rastin kur topi shkon në portën e ekipit që e godet, akordohet goditje nga këndi për ekipin kundërshtar. Edhe pse Cassio ishte i sigurt në njohuritë e tij të rregullave, trajneri i tij Mano Menezes duket se u trondit kur pa topin në rrjetë.

Cassio, që kaloi pjesën më të madhe të karrierës së tij në Corinthians pas një periudhe me PSV Eindhoven ku fitoi Eredivisien dhe Kupën Holandeze, ka pasur një karrierë të spikatur me ekipin, duke fituar Kupën e Botës për Klube në 2013 dhe Serie A dy herë, si dhe duke qenë pjesë e skuadrës fituese të Copa America të Brazilit në 2019. Ai ka bërë 548 paraqitje për Corinthians dhe ka vetëm një paraqitje për kombëtaren braziliane që daton nga 2017. /Telegrafi/