Xhorxho Zhujoviq, përfaqësues i Partisë Socialdemokrate të Serbisë, presidenti të cilës është Rasim Lajiq, ka thënë për Nova.rs, se obligimi i tij civil ka qenë të shkatërrojë muralin dedikuar Ratko Mlladiqit.
Ai tha se para muralit ka hasur në burrin për të cilin besohet të jetë pjesë e një prej organizatave të djathtës, i cili e kërcënoi duke i thënë se e di se ku do ta gjej, transmeton Telegrafi.
Në muralin me fotografinë e Ratko Mlladiqit është hedhur një kovë me gëlqere, e pas këtij veprimi qëndron Xhorxho Zhujoviq, aktivisti shumëvjeçar dhe anëtari i SDPS-së. Ai ka treguar se pse e ka bërë këtë.
“Murali me fotografinë e Mlladiqit paraqet një njollë në fytyrën e çdo qytetari të Serbisë, pavarësisht cilit popull i përkiste, fesë apo orientimit politik. Të gjithë ata që përpiqen ta mbrojnë këtë mural na bëjnë një shërbim të keq të gjithë neve”, ka shpjeguar Zhujoviq, i cili theksoi se lëvizja e tij ishte një vepër civile.
“Këtë që e kam bërë e cilësoi si diçka normal, veprim njerëzor. Ofroj mbështetje për secilin që me aktivitetet e tij tregon se është kundër luftës dhe për një shoqëri normale”, ka shtuar ai.
“Gazetarët me thanë se ai është nga Levijatani… Ka pasur një konflikt verbal, tentoi të më vërsulet. Por më pas u largua paksa, për të bërë një telefonatë. Kur e bëra atë që u përfola, ai më tha se do të më gjej, se e di se kush jam. Nuk arrita ta shoh kush ishte, pasi që fytyrën e kishte të mbuluar”, tha Zhujoviq.
Këtë mural e kanë ruajtur policia serbe, e aktivistet Aida Qoroviq dhe Jelena Jaqimoviq janë arrestuar pasi kishin hedhur vezë në drejtim të muralit. Megjithatë disa orë më vonë ishin liruar. /Telegrafi/
