Gjashtë herë kampioni francez i futbollit Bordeaux pushon së ekzistuari si klub profesionist që nga sot, pasi Girondins vendosën të heqin dorë nga ai status pas problemeve të mëdha.
I themeluar në 1881, Girondins Bordeaux është një nga klubet më të njohura të futbollit në Francë me gjashtë tituj të Ligue 1, prej tyre i fundit në vitin 2009.
Bordeaux ka lënë një gjurmë të pashlyeshme në Francë, ndërsa epoka e artë e klubit ishte në vitet 1980, ku u karakterizua me dominim të brendshëm dhe edicione mbresëlënëse evropiane.
Lojtarët legjendar që kanë veshur fanellën e këtij klubi ishin ish përzgjedhësi i Kosovës, Alain Giresse dhe Zinedine Zidane, i cili shfaqi talentin e tij në rritje në Bordeaux përpara se të bëhej një ikonë globale.
Emra të tjerë të mëdhenj që veshën fanellën e këtij klubi ishin Hector De Bourgoing, Bernard Lacombe, Klaus Allofs, Patrick Battiston, Jean Tigana, Bixente Lizarazu, Eric Cantona, Didier Deschamps, Christophe Dugarry, Pauleta, Ulrich Ram, Souleymane Diawara etj…
Klubi u vendos në administrim në vitin 2021, por u ble nga ish-pronari i Lille, Lopez po atë vit. Megjithatë, keqmenaxhimi i tij i vazhdueshëm bëri që klubi të pësonte rënie në divizionin e dytë.
Përfundimi i tyre në vendin e 13-të gjatë sezonit 2023-24 në Ligue 2 ishte një rekord i ulët për klubin dhe problemet e tyre të mëvonshme financiare i bënë ata të zbritën në nivelin e tretë të futbollit francez nga FFF. /Telegrafi/