Bayern Munich nuk gabon, fiton pikët e plota ndaj Freiburgut në udhëtim

Bayern Munich ka shënuar fitore me rezultat 2-1 në udhëtim ndaj Freiburgut në kuadër të xhiros së 19-të në Bundesliga. 

Në minutën e 14-të ishin bavarezët ata të cilët rrezikuan të parët në këtë takim duke goditur shtyllën me anë të Jamal Musialas. 

Mysafirët morën avantazhin në minutën e 15-të përmes Harry Kane i cili krijoi hapësirë për veten për ta çuar topin në rrjetë për 1-0. 

Me epërsi minimale të Bayernit përfunduan 45 minutat e para të këtij takimi. 

Pasi nisi pjesa e dytë, Bayern arriti që ta gjejë edhe golin e dytë, kësaj radhe përmes Kim Min-Jae (54’) i cili nga afërsia realizoi me kokë për 2-0. 

Fillimisht pati dyshime se a ishte goli i rregullt dhe u desh që gjyqtari ta shikojë aksionin në VAR, por në fund ai vendosi që nuk kishte asgjë të palejuar dhe goli u pranua. 

Vendasit reaguan eventualisht në minutën e 69-të duke ngushtuar epërsinë me anë të Matthias Ginter që shënoi me kokë për 2-1. 

Megjithatë, ky gol nuk mjaftoi që ata të evitojnë humbjen dhe në fund bavarezët morën tri pikët. 

Me këtë fitore Bayerni shkon në kuotën e 48 pikëve të grumbulluara në kampionat, gjashtë më shumë se Bayer Leverkuseni në pozitën e dytë që ka 42 sosh./Telegrafi/