Istanbul Basaksehir e ka dënuar me gjobë prej 370.000 eurosh mesfushorin turk, Arda Turan , për përfshirjen e tij në incidentin me këngëtarin Berkay Sahin.
31-vjeçari, i cili është i huazuar në Superligën turke nga Barcelona, ka pranuar se është përfshirë në incident, mirëpo ka thënë se detajet e përleshjes janë ekzagjeruar nga mediat.
Berkay Sahin ndodhej me gruan e tij në klubin e natës kur ndodhi incidenti. Këngëtari ka thënë për gazetën Haberturk se Turan ia kishte ngacmuar gruan dhe pastaj e kishte sulmuar vet atë.
Sipas Daily Sabah, gjatë përleshjes, Arda ia kishte thyer hundën Sahinit, ashtu që ky i fundit ka kërkuar ndihmë mjekësore. Turan është konfrontuar më këngëtarin e muzikës pop edhe në spital, kurse më pas i ka kërkuar falje.
Futbollisti i ka mohuar akuzat se e ka sulmuar Berkay Sahinin, i cili ka pohuar se Arda ka gjuajtur edhe me armë.
Përkundër mohimit nga Arda në lidhje me detajet e incidentit, bordi i Basaksehir ka mbajtur një mbledhje të jashtëzakonshme të martën për këtë çështje dhe ka marrë vendim për dënimin e futbollistit.
“Meqenëse kjo çështje tash i takon gjykatës dhe e ka të rezervuar të drejtën për të marrë vendime dhe dënime të tjera, ne e kemi dënuar Arda Turanin me 2.5 milionë lira turke dhe duam ta njoftojmë publikun se obligimet profesionale të futbollistit ndaj klubit tonë do të vazhdojnë derisa gjykata të marrë një vendim përfundimtar”, thuhet në komunikatë.
Kjo është gjoba më e madhe që ka marrë një futbollist në elitën e futbollit turk. /Telegrafi/